Чт04262018

Last updateВт, 24 Апр 2018 3pm

Матолиби тоза :
YJ Title Ticker - модуль joomla Joomla

ҲУҚУҚ

ПЕШСАФОН МУКОФОТ ГИРИФТАНД

ДАЪВАТИ БАҲОРӢ БА ХИЗМАТИ ҲАРБӢ ИДОМА ДОРАД

 

Маъракаи даъвати ҷавонон ба сафи Қувваҳои Мусаллаҳи кишвар дар ноҳия ҷараён дорад. Раиси ноҳия Раҷабзода Миралӣ гуфт, ки байни ҷамоатҳои шаҳраку деҳот мукофот эълон шудааст. Ҳар ҷамоате, ки даъвати садфоизаи наваскаронро дар муҳлатҳои муқарраргардида иҷро менамояд, 5 ҳазор сомонӣ мукофот мегирад.

Ҷамоатҳои деҳоти Вашгирд ва Чашмасор нақшаи сафарбаркунии ҷавононро ба аскарӣ дар рӯзи нахустини даъват иҷро намуданд. Котиби Ҷамоати Вашгирд А.Сатторов ва раиси Ҷамоати Чашмасор Ф.Амонатов сазовори мукофот шуданд.

Даъвати баҳории ҷавонон ба сафҳои Артиши мамлакат таҳти назорати раиси ноҳия қарор дорад. То ба имрӯз нақша қариб ба 40 фоиз расидааст. Ният ҳаст, ки дар ин даъват на камтар аз 100 нафар ба аскарӣ гусел карда мешаванд. Комиссари ҳарбии ноҳияи Файзобод, подполковник Фирӯз Шамсов ифтихор мекунад, ки айни замон зиёда за 350 нафар ҷавонписарони Файзобод дар сафи Қувваҳои Мусаллаҳи Ҷумҳурии Тоҷикистон хизмати Ватан-Модарро бо омодагии комили ҳарбӣ ва ахлоқи намунавӣ ба ҷо оварда истодаанд. Ҳамчунин 19 нафар ҷавонписарони Файзобод дар литсей ва донишкадаҳои ҳарбии дохили кишвар ва хориҷ бомуваффақият таҳсил мекунанд. Ӯ мегӯяд: «Ҳифзу ҳимояи манфиатҳои давлат, амният ва иқтидори мудофиавии он барои ҳар шаҳрванде, ки дар хоки муқаддаси Ватан ҳаёт ба сар мебарад, қарзи виҷдон ва амри қонунист».

Боварии комил дорем, ки ҷавонписарони диёр бо номуси баланди Ватандорӣ қарзи худро ба ҷо меоранд.

КОРГУЗОРӢ БО ҲУҶҶАТҲО МУНОСИБАТИ ҶИДДИРО МЕХОҲАД

Фаъолияти бахши Раёсати асноди ҳолати шаҳрвандии Вазорати адлияи Ҷумҳурии Тоҷикистон дар ноҳия ба Конститутсияи Ҷумҳурии Тоҷикистон асос ёфта, аз Кодекси оилаи Ҷумҳурии Тоҷикистон, Қонуни Ҷумҳурии Тоҷикистон “Дар бораи бақайдгирии давлатии асноди ҳолати шаҳрвандӣ” ва дигар санадҳои меъёрии ҳуқуқии байналмилалие, ки онҳоро Ҷумҳурии Тоҷикистон эътироф намудааст, иборат мебошад.

Дар соли 2017 аз тарафи ҷамоатҳои шаҳраку деҳот ва бахши сабти асноди ҳолати шаҳрвандии ноҳия 6154 адад сабт тартиб дода шудааст, ки 3402-тои он ба ҷамоатҳои шаҳраку деҳот тааллуқ доранд: 2243 адад сабти таваллуд, 300 адад сабти вафот, дар маҷмӯъ 55 фисади сабтҳои асноди ҳолати шаҳрвандӣ ба ҷамоатҳои шаҳраку деҳот рост меояд.

Баробари муваффақиятҳо дар фаъолияти кории мутасаддиёни ҷамоатҳои шаҳраку деҳоти ноҳия сари масъалаи мазкур камбудиҳо ба назар мерасанд.

Роҳ додан ба хатоҳои имлоӣ ва хунукназарона рафтор намудани шахси мутасаддӣ нисбати ҳуҷҷатгузорӣ сабаб мешавад, ки шаҳрванд аз нав ҳуҷҷати такрорӣ гирад, ислоҳот дарорад ва ин сабаб мешавад, ки ба буҷаи оилаи шаҳрванд хисорот ворид гардад. Камбудии дигаре, ки дар фаъолияти котибони ҷамоатҳои шаҳраку деҳот ба чашм мерасад, сари вақт аз қайди давлатӣ нагузаронидани навхонадорон мебошад ва ин сарчашма мешавад барои дер гирифтани шаҳодатномаи таваллуди кӯдак, яъне барқарор намудани сабти таваллуди кӯдакони аз  яксола боло, ки ба 1205 адад ва сабти муқаррар намудани падарӣ, ки ба 442 адад расидааст.

Тибқи моддаи 13 Кодекси оилаи Ҷумҳурии Тоҷикистон синни никоҳӣ барои марду зан аз 18-солагӣ муқаррар шудааст. Дар ҳолатҳои истисноӣ суд ҳақ дорад дар асоси хоҳиши шахсони издивоҷкунанда синни никоҳиро ба муҳлати на бештар аз як сол кам кунад.

Дар соли 2017 дар 24 адад маҷлиси судӣ оид ба кам кардани синни никоҳӣ иштирок намудем ва дар рафти маҷлиси судӣ ба ҳолатҳое вохӯрдем, ки духтарон ба ҳаёти оилавӣ тайёр набудани худро нишон медоданд, лекин сабаби рад карда натавонистани мо ва судяҳо баъзан маълумотномаҳое мешуданд, ки аз ҷониби ҷамоатҳои шаҳраку деҳот ва Бахши ҳифзи иҷтимоии аҳолии Мақомоти иҷроияи ҳокимияти давлатии ноҳия ҷиҳати надоштани шароити молиявӣ ва камбизоатӣ дода шудаанд. Инчунин ба зинаи сеюми таҳсил, яъне синфи 10-11 фаро гирифта нашудани духтарон низ сабаб мегардад. Бояд қайд кард, ки дар соли 2017 аз ҷониби ҷамоатҳои шаҳраку деҳот ва Бахши САҲШ-и ноҳия 951 адад никоҳ, аз ҷумла 754 адад никоҳи тантанавӣ ба қайд гирифта шудааст. Камбудиии ҷиддие, ки аз ҷониби баъзе аз котибони ҷамоатҳои шаҳраку деҳот содир мегардад, насупоридани ҳисоботи оморӣ дар вақти муайянгардида ва бо камбудиҳо супоридани он мебошад. Аз 339 адад никоҳҳои бекоршуда 250 ададашон дар асоси ҳалномаи суд бекор гардидаанд. Бояд қайд намуд, ки аз оилаҳои вайроншуда 351 нафар (соли 2015-95 нафар, соли 2016- 118 нафар, соли 2017- 138 нафар) кӯдакони ноболиғ боқӣ мондаанд, ки аксарияташон дар тарбияи модар мебошанд.

Баҳри рафъи камбудиҳо моро мебояд, ки дар ҳамбастагӣ бо фаъолони ноҳия дар ин самт кор барем, то ин ки камбудиҳои ҷойдошта сари вақт бартараф гарданд.

ЭҲТИЁТ - НИМИ ҲАЁТ

Эҳтиётро ними ҳаёт гуфтаанд, гузаштагонамон.  Имрӯз, бахусус ҳангоми ҳаракат дар роҳ  бо эҳтиёт будан тақозо мешавад. Аз ин мебарояд, ки ҳар шахс ҳангоми убури роҳҳои нақлиётӣ эҳтиёткор бошаду саломатии худ ва дигаронро зери хатар нагузорад.

Таҳлилҳо нишон медиҳад, ки вақтҳои охир вазъи содиршавии ҳодисаҳои роҳу нақлиёт бо иштироки пиёдагардон дар қаламрави ҷумҳурӣ ташвишовар гаштааст, ки ин боиси нигаронии роҳбарияти Вазорати корҳои дохилии мамлакат  гардидааст. Дар бештар аз як моҳи   соли 2018 дар қаламрави ҷумҳурӣ 82 ҳодисаи роҳу нақлиёт ба қайд гирифта шудааст, ки аз ин 45 нафар зери нақлиёт монда, 14 нафар пиёдагардон ҳалок, 30 нафари онҳо ҷароҳатҳои гуногуни ҷисмонӣ бардошта дар беморхонаҳо бистарӣ гардиданд. Зиёдшавии чунин ҳодисаҳои нақлиётӣ дар шаҳри  Душанбе 57 фоиз, ноҳияҳои Хуросон ва Ёвони вилояти Хатлон 41,7 фоиз ва ноҳияи Бобоҷон Ғафуров ва шаҳри Хуҷанди вилояти Суғд 57 фоиз  ба чашм мерасанд.

Ба мақсади баланд бардоштани интизоми ронандаҳо дар роҳ, ҳамчунин пиёдагардҳо ва коҳиш додани ҳодисаҳои нақлиётӣ дар қаламрави ҷумҳурӣ аз 10 то 20 феврали соли 2018 амалиёти мақсадноки «Пиёдагард» гузаронида шуд. Барои дар сатҳи баланд гузаронидани амалиёти мақсадноки «Пиёдагард» дар ШБДА ШВКД-и ноҳия нақша-чорабинӣ тасдиқ ва амалӣ гардид. Ҳангоми гузаронидани амалиёт баробари  кормандони  ШБДА ШВКД ҳамчунин  нозирони ғайриштатӣ ва аз дигар имкониятҳои мавҷуда истифода гардид.

Ҳайати шахсии кормандон барои пешгирии қоидавайронкуниҳои пиёдагардҳо ва баланд бардоштани интизоми нақлиётӣ дар терминалҳои мусофирбар, муассисаҳои таълимӣ ва аҳолӣ корҳои ташвиқотию тарғиботӣ ва суҳбату вохӯриҳо гузаронд, то сатҳи ҳодисаҳои нақлиётӣ бо айби пиёдагардҳо   коҳиш дода  шавад. 

БИСТУПАНҶ СОЛ - РОҲИ ПУРШАРАФ

 

Бахшида ба биступанҷумин солгарди таъсисёбии Қувваҳои Мусаллаҳи Ҷумҳурии Тоҷикистон санаи 23 феврали соли ҷорӣ дар толори Филармонияи халқии ба номи Нигина Рауфоваи ноҳия бо иштироки роҳбарони ташкилоту муассисаҳо  кормандони соҳаи ҳуқуқу тартибот, собиқадорони ҷангу меҳнат ва ҷанговарони байналмилал ҷамъомади тантанавӣ доир гардид. Пеш аз оғози чорабинии идона дастовардҳои фарҳангӣ ва ҳунарҳои мардумии  сокинони Ҷамоати шаҳраки Файзобод намоиш дода шуд.

Дар оғози чорабинӣ раиси ноҳия, узви Маҷлиси миллии Маҷлиси Олии Ҷумҳурии Тоҷикистон Миралӣ Раҷабзода аз роҳи пуршарафи тайкардаи Қувваҳои Мусаллаҳи кишвар дар чоряк асри мавҷудияташ ҳарф зада, корнамоиҳоу ҷонбозиҳои афсарону қумандонҳои собиқи соҳаро намунаи олии худшиносии милливу ватанпарастӣ хонд.

Нотиқ сокинони ноҳияро ба ин ҷашни фархундаву шуҷоату мардонагӣ муборакбод намуда, аз номи мақомоти иҷроияи ҳокимияти давлатии ноҳия ба афсарони комиссариати ҳарбӣ, ШВКД, сарбозони хизмати Модар-Ватанро адо намуда ва волидоне, ки ду ва зиёда фарзанди худро ба хизмати халқу Ватан сафарбар намудаанд, ифтихорнома ва туҳфаҳои пуливу молӣ тақдим намуд.

Пас аз қисмати тантанавии чорабинӣ аҳли фарҳанги ноҳия дастагули таронаҳои дар васфи Ватан омоданамудаи хешро бо иштироки Ҳунарманди шоистаи Ҷумҳурии Тоҷикистон Ҷумъахон Сафаров пешкаши ҳозирин гардониданд.

130 АДАД ТАЛОҚ ДАР 1 СОЛ

Ё КИҲО ГУНАҲГОРОНИ ТАҚДИРИ НОРӮШАНИ 138 НАФАР ТИФЛАКОНИ НОБОЛИҒАНД?!

«Оила ҳамчун падидаи иҷтимоиву ҳуқуқӣ маҳаки асосии ҷамъиятро ташкил дода, дар сатҳи Конститутсияи кишвар барои ҳифзи он ва таҳти ғамхории махсуси давлат фаро гирифтани модару кӯдак аз ҷониби Ҳукумати кишвар ҳамаи чораҳои зарурӣ андешида мешаванд. Оила дар фарҳанги мардуми куҳанбунёди тоҷик ҳамчун ниҳоди муқаддас эътироф гардидааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмию таҳаммулгароӣ маҳз дар оила ташаккул меёбад».

Эмомалӣ Раҳмон,

Асосгузори суҳлу ваҳдати миллӣ-Пешвои миллат, Президенти Ҷумҳурии Тоҷикистон.

Таҷрибаи ҳаёт ва зиндагӣ нишон медиҳад, ки инсон ҳамеша дар ҷустуҷӯи бахт ва ҳамқадами парвозии орзуҳои хеш  аст. Хушбахт ҳамон касест, ки дар интихоби ҳамсафари ҳаётӣ ба хотири бунёди оила иштибоҳ намекунад. Ҳар шахс бояд дониста бошад, ки хушбахтии оилавӣ хати шукӯҳи зиндагиро муқаррар карда, хиёнат ба ин муқаддасот пару боли ормонҳоро мешиканад, ки оқибат гирифтори азоби виҷдон мегардад.

Оила узви ҷудонашавандаи зиндагии инсон аст ва он бояд дар пояи ҳамдигарфаҳмӣ, муҳаббату самимият, тарбияи фарзандони хушодобу солеҳ, нигоҳ доштани нангу номуси оиладорӣ асос бигирад.   Пас, бунёди оила ҳавову ҳавас нест. Ҷавонон бояд пеш аз ақди никоҳ бастан дуруст дарк намоянд, ки хонадоршавӣ танҳо ба хотири зан ё шавҳар шудан нест, балки  ин масъулияти бузург назди ҷомеа ва сарнавишти наслҳост. Мутаассифона, имрӯз баъзан хурдтарин нофаҳмиҳо боиси сар задани ихтилофҳо ва дар ниҳояти кор ба ҷудошавии оилаҳо оварда мерасонад, ки бисёр нанговар аст. Ба рақамҳо рӯ меоварем: соли 2017 дар ноҳия 130 ҳолати бекоршавии ақди никоҳ ба қайд гирифта шудааст, ки ин шумора назар ба чанд соли охир зиёд аст.

Ин эрод - сабаби зиёд гардидани ҷудошавии оилаҳо - аз минбари иҷлосияи Маҷлиси вакилони халқ ва маҷлиси ҷамъбасти сол дар мақомоти иҷроияи ҳокимияти давлатии ноҳия садо дод. Сабабҳои асосии ҷудошавии оилаҳо аз рӯи таҳлилҳо чунин арзёбӣ гардид: мувофиқ наомадани хислатҳои зану шавҳар дар оиладорӣ, омода набудани ҷавонон ба зиндагии оилавӣ ва кӯтоҳандешии навхонадорон, дахолати волидон, аз тарафи мардон бунёд намудани оилаҳои дигар ва хиёнати занҳо ба шавҳарҳо, никоҳи хешовандӣ, ба муҳоҷират рафтани ҷавонписарон ва муддатҳои зиёд барнагаштани онҳо, издивоҷи маҷбурӣ, ғурури ноҷо, беҳудагӯӣ, ҳавобаландии зану шавҳар нисбати якдигар, хушунати хонаводагӣ, кам ҳам бошад рашки беасоси хушдоманҳо нисбати келинҳо, ба хотири соҳиби шаҳрвандии Русия шудан ва, аз ҳама ташвишовар, бетарафии атрофиён, масъулону фаъолони аҳли ҷамоатчигӣ.

Мувофиқи маълумотномаи дардастдоштаи мо ҷудошавии оилаҳо дар Ҷамоатҳои деҳоти Мискинобод 24 адад, Қалъаидашт 21 адад, Чашмасор 1 адад, Ҷавонон 17 адад, шаҳраки Файзобод 25 адад, ба номи Д.Алиев 21 адад, Вашгирд 9 адад, Меҳробод 24 адад, Бӯстон 12 адад аст. Аз оилаҳои ҷудошуда 138 нафар кӯдакони ноболиғ аз оғӯши меҳру муҳаббати якҷояи падару модар маҳрум мондаанд, ки тарбияю тақдири ояндаи онҳо норӯшан мемонад. Рақамҳои болоӣ бозгӯи фаъолияти  масъулини ҷамоатҳои шаҳраку деҳоти ноҳия сари масъалаи мазкур мебошад.

Ба андешаи мо, барои пешгирии ин падидаи номатлуб таъҷилан аз ҳисоби масъулон гурӯҳи корӣ созмон дода, дар ҳар як ҷамоати деҳот ва шаҳрак вохӯриҳои рӯ ба рӯ, суҳбати мизҳои мудаввар гузаронда, сабабҳои ҷудошавии оилаҳоро таҳлилу муҳокима карда, баҳри баланд бардоштани маърифати оиладорӣ, бунёди оилаҳои солиму пойдор, зери назорати доимӣ гирифтани оилаҳое, ки дар арафаи ҷудошавианд, мақомотҳои дахлдор ва кумитаҳои маҳалла ҷалб карда шаванд. Зеро паси ҳар як оилаи ҷудошуда тақдире, ғаму андӯҳе, ташвише, беадолатии иҷтимоӣ ва ё фишори бераҳмонаи зиндагӣ ниҳон аст. Ва бетарафии ҳар яки мо нисбати вайроншавии оилаҳо - ин ниҳоди муқаддас – маҳаки асосии ҷамъият гуноҳест нобахшиданӣ. 

АРТИШ МАКТАБИ ҶАВОНМАРДИСТ

Имсол ба таъсисёбии Қувваҳои Мусаллаҳи Ҷумҳурии Тоҷикистон 25 сол пур мешавад. Қувваҳои Мусаллаҳи Ҷумҳурии Тоҷикистон 23 феврали соли 1993 дар давраи хеле пуртаззод, замони  ҷонбозиҳо баҳри таъмини сулҳу субот арзи вуҷуд намуд.

Асосгузори сулҳу ваҳдати миллӣ - Пешвои миллат Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон Эмомалӣ Раҳмон аз рӯзҳои аввалини таъсисёбии артиш барои мустаҳкам шудани иқтидори Ватан беандоза кӯшиш менамояд.

Ҳукумати Тоҷикистон ба ислоҳоти соҳаи ҳарбӣ, таъминоти моддию техникӣ, баланд бардоштани қобилияти ҷангию омодагии ҳарбии воҳидҳои низомии артиш ва тарбияи   мутахассисони варзида таваҷҷуҳ  зоҳир менамояд. Аз ин рӯ, мо вазифадорем, ки бо ҳисси ифтихор ва масъулият дар сафи пеш бошем.

Сафҳои Қувваҳои Мусаллаҳ барои насли наврас мактаби бузурги обутоби ҳарбию ҷисмонӣ ба ҳисоб меравад. Маҳз дар ҳамин ҷо ҷавонписарон шуҷоату мардонагӣ омӯхта, дӯст доштан ва содиқона муҳофизат кардани хоки ватани азизро ёд мегиранд.

Бо хушнудӣ изҳор менамоям, ки Артиши миллӣ такягоҳи асосии давлат ва сипари боэътимоди миллат гардида, Ватани азизамонро содиқона муҳофизат мекунад. Имрӯзҳо беш аз 352 нафар ҷавонписарони ноҳияи Файзобод дар сафи Қувваҳои Мусаллаҳи Ҷумҳурии Тоҷикистон хизмати Ватан-Модарро бо сарбаландӣ иҷро намуда истодаанд. Ҳифзу ҳимояи манфиатҳои давлат, амният ва иқтидори мудофиавии он барои ҳар шаҳрванде, ки дар хоки муқаддаси Ватан ҳаёт ба сар мебарад, қарзи виҷдон  ва амри қонунист. Зеро дар моддаи 43-и Сарқонуни Ҷумҳурии Тоҷикистон омадааст: «Ҳифзи Ватан, ҳимояи давлат, таҳкими истиқлолият ва иқтидори мудофиавии он вазифаи муқаддаси ҳар як шаҳрванд аст».  

Боиси ифтихор аст, ки имрӯзҳо 19 нафар ҷавонони Файзобод дар литсей ва донишгоҳҳои ҳарбии дохил ва хориҷи кишвар таҳсил менамоянд. Мо бо номи неки фарзандони барӯманди диёрамон генерал-майори адлия Ҳабибулло Юсуфов, Меъроҷиддин Ҳакимов, полковникҳо Раҷабалӣ Собиров, Саид Каримов, Асомиддин Сафаров, Маҳмадшӯриш Шарифов, подполковникҳо Умаршо Холов, Суҳайлӣ Раҷабов, майор Зафар Раҳматов, лейтенанти калон Асламбек Худойдодов ва даҳҳо дигарон ифтихор менамоем.

Ҳайати шахсии Қувваҳои Мусаллаҳи Ҷумҳурии Тоҷикистон дар тӯли 25 соли фаъолияти хеш дар ҳама лаҳзаҳои душвор ҷасорату мардонагӣ ва садоқат нисбат ба савганди ҳарбӣ зоҳир карда, баҳри ҳифзи дастовардҳои истиқлолият, пойдории сулҳу субот ва сохти конститутсионӣ қисме аз онҳо ҷони худро дар роҳи озодии Ватан нисор намуданд. Номи шаҳидон дар ёди   мардуми ҷумҳурӣ, дар саҳифаҳои таърих  мемонад.

Рӯзи Қувваҳои Мусаллаҳи Ҷумҳурии Тоҷикистон ба иди муқаддас ва пуршукӯҳи миллати бофарҳанги тоҷик табдил ёфтааст. Дар ин рӯзи пурнишот мо гирди ҳам омада, шукргузорию ифтихор мекунем, ки аз ниҳоли меваи пурнишоти истиқлолият баҳравар ҳастем.

Комиссариати ҳарбии ноҳия вазифаҳои хизматии худро тибқи талаботи Қонуни Ҷумҳурии Тоҷикистон “Дар бораи уҳдадориҳои умумии ҳарбӣ ва хизмати ҳарбӣ” ба роҳ мондааст.

Бо дастгирии мақомоти иҷроияи ҳокимияти давлатии ноҳия ва ҳамкорӣ бо мақомоти ҳифзи ҳуқуқ комиссариати ҳарбӣ як қатор чорабинӣ гузаронд. Дар давоми сол ба қайдгирии ибтидоии ҳарбии ҷавонон ба анҷом расонда,  2 маротиба даъвати ҷавонон ба сафи Қувваҳои Мусаллаҳ таъмин карда шуд. Бахшида ба ҷашну идҳои миллӣ дар қисмҳои низомӣ дастурхони идона ороста, бо ҳузури падару модарон аз шароити хизмати сарбозон огоҳ гардидем, то рӯҳияи ҷавонон ба ватанпарастӣ боло равад.

Боварӣ дорем, ки тамоми хизматчиёни ҳарбии мамлакат барои ҳифзи амнияти давлат ва сулҳу суботи кишвар қувва, вақт ва донишу малакаи худро дареғ намедоранд ва ба халқу ватани хеш чун фарзанди бонангу номус содиқона ва софдилона хизмат мекунанд. 

ИҶРО НАКАРДАНИ УҲДАДОРӢ ҶИНОЯТ АСТ

 

БАРОИ ТАЪЛИМИ ФАРЗАНДОН КӢ МАСЪУЛ АСТ?

Тарбияи кӯдак дар ҳар давру замон аз нозуктарин ва мушкилтарин масъалаҳо буда, он асосан аз оила  оғоз меёбад. Фарзанд нахуст дар ин муҳит ҳамчун шахсият ва инсони комил ташаккул меёбад ва баъд ба ҷомеа мепайвандад. Агар пояи тарбияи хонаводагӣ заиф бошад, наметавон хулосабарорӣ кард, ки хонавода ба ҷомеа фарди солим ва ташаккулёфтаро дода метавонад. Аз ин нигоҳ, тарбия кардан ва ба камол расонидани фарзанд вазифаи муҳими ҳар як падару модар дар назди ҷомеа ва инсоният мебошад.

Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» падару модарро уҳдадор менамояд, ки фарзандро дар рӯҳияи эҳтиром ба қонун ва арзишҳои миллӣ тарбия намуда, кирдорҳои зиддиҷамъиятӣ ва муносибати тахрибкоронаи фарзандро ба муҳити зист пешгирӣ намояд.

Санҷишҳои гузаронидаи прокуратураи ноҳия дар ин самт муайян намуданд, ки мутаассифона, на ҳамаи падару модарон масъулияти худро хуб дарк мекунанд ва ба таълиму тарбияи фарзанд таваҷҷуҳ зоҳир менамоянд, ки дар натиҷа, фарзандон даст ба қонунвайронкунӣ ва ҷинояткорӣ мезананд. Мисолҳои поёнӣ  тасдиқи  ин навиштаҳои болоист.

Ноболиғ Султонов Эмоммуҳаммад Саъдиевич 4 майи соли 2017  тахмин соати 23   дар маркази дилхушии дар қисмати шарқии кӯчаи И.Сомонии маркази  ноҳия воқеъбуда  бо ҳамроҳии рафиқонаш Достов Қаҳрамон Саидович ва Саидмуродзода Салоҳиддини Фатҳуддин огоҳӣ ёфт, ки  шаҳрванд Ғаюров Одилбек Сафаралиевич   бо худ маблағи зиёд дорад. Аз ин рӯ бо мақсади ошкоро тасарруф намудани маблағҳои ӯ  бо рафиқонаш   маслиҳати пешакӣ намудаву пайи таъқиби  номбурда шуданд.  Одилбек Ғаюровро  тахминан соати 24  дар кӯчаи И.Сомонӣ,  назди бинои рақами 7  зери латукӯб қарор дода,  аз ҷайби шими ӯ 350 сомонӣ пули нақдро тасарруф  кардаву аз ҷои ҳодиса ғайб заданд. Ин наврасон бо чунин киродорашон  ба Ғаюров О.С. ҷароҳати ҷисмонии дараҷаи миёна ва зарари ҷиддии моддӣ  расонданд.

Санҷиши ҳолати мазкур муайян намуд, ки ноболиғ Султонов Э.С. дар тарбияи модараш Назарова Саломат Дӯстмуродовна қарор дорад ва барои ба таври дахлдор иҷро накардани уҳдадориҳо нисбати модари ноболиғ  бо моддаи 90 Кодекси ҳуқуқвайронкунии маъмурии Ҷумҳурии Тоҷикистон парвандаи ҳуқуқвайронкунии маъмурӣ оғоз карда шуда, барои баррасӣ ба суди ноҳия ирсол гардид.

Ё ин ки ноболиғ Раҷабзода Муҳаммадосимии Таваккал 20 марти соли 2017   дар кӯчаи Саидшоҳии маркази ноҳия тахминан соати 10 бо мақсади дуздӣ дари автомашинаи тамғаи «Мерседес-бенс», рақами давлатиаш 42-88 АС 01, ки  ба шаҳрванд Давлатов Мирзомуддин Хурсандович тааллуқ дошт ва  дар канори роҳи мошингарди ин кӯча гузошта шуда буд,  кушода, пинҳонӣ аз дохили автомашинаи мазкур як адад флешкорд арзишаш 25-сомонӣ, як адад ҳамёни дастӣ арзишаш 30 сомонӣ, ки дар дохилаш 725 сомонӣ пули нақд буд, як адад дафтари корӣ арзишаш 15сомониро тасарруф мекунад. Ҳамёни  дастӣ ва дафтари кории дуздидаашро дуртар аз ҷои ҳодиса партофта, 25 сомон маблағи нақдро ба манфиати худ истифода кардаву  700 сомонии боқимонда ва флешкордро бо худ нигоҳ медорад. Бо  ин кирдорҳояш Муҳаммадосимии Таваккал ба Давлатов М.Х. ба маблағи 795 сомонӣ зарари ҷиддӣ  расондааст. 

Ҳамчунин ноболиғ Раҷабзода М.Т. такроран 28 марти соли 2017 тахминан соати 11 бо мақсади дуздӣ боз  дар кӯчаи Саидшоҳии маркази ноҳия  дари даромади автомашинаи тамғаи «Мерседес-бенс» рақами давлатияш  94-84 АЕ 08, ки  ба шаҳрванд Бобиев Фазлиддин Иноятуллоевич тааллуқ дорад ва  дар канори роҳи мошингарди  кӯчаи мазкур қарор  дошт, кушода пинҳонӣ аз дохили автомашинаи мазкур як адад телефони мобилии тамғаи «Самсунг» (арзишаш 1500 сомонӣ)-ро тасарруф намудаву онро дар  манзили истиқоматии худ воқеъ дар кӯчаи М. Турсунзода пинҳон мекунад. Бо ин амали нангини худ номбурда  ба Бобиев Ф.И. ба маблағи 1500 (ҳазору панҷсад) сомонӣ зарари ҷиддӣ расонд. 

Боиси зикр аст, ки ноболиғ Раҷабзода М.Т. дар тарбияи падараш Юсупов Таваккал Раҷабович  қарор дорад. Ана ҳамин бемасъулиятиро дар тарбияи писари ноболиғаш ба назар гирифта, нисбат ба Юсупов Т.Р. бо моддаи 90 Кодекси ҳуқуқвайронкунии маъмурии Ҷумҳурии Тоҷикистон парвандаи ҳуқуқвайронкунии маъмурӣ оғоз карда, барои баррасӣ ба суди ноҳия фиристода шуд.

Санҷишҳои прокурорӣ ҳолатҳоеро низ ошкор намуд, ки баъзе аз падару модарон бо рафтори худ даст ба ҷинояткорӣ задаву бар хилофи манфиатҳои фарзандонашон, монеи идомаи таҳсили онҳо мешаванд. Чунончӣ, Давлатова Гулнисо Мирзошоевна, сокини  деҳаи Файзобод, Ҷамоати деҳоти ба номи  Дӯстмурод Алиев тибқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» уҳдадор буд, ки барои ба таълим фаро гирифтани фарзандаш мусоидат намояд, яъне бо ин мақсад барои  таҳсили фарзандаш дар муассисаҳои таълимӣ шароит фароҳам оварда, ҳамчунин ӯро бо воситаҳои зарурии таълимӣ таъмин намояд. Аммо Давлатова Г.М. дидаву дониста ба таҳсили фарзанди ноболиғи худ Тоҳирова Идигул Фирдавсиевна, ки айни ҳол бояд  дар синфи 2 муассисаи таҳсилоти миёнаи умумии рақами 6-и деҳаи Файзободи ноҳия таҳсил мекард, монеъ шуда, ӯро  аз аввали моҳи сентябри соли 2016 то инҷониб  аз таҳсил дур сохтаву  ба корҳои рӯзгори хона ҷалб намудааст.

Зимни санҷишҳои прокурорӣ ҳамин ҳолатҳоро ба инобат гирифта, прокурори ноҳия нисбати Давлатова Г.М. бо моддаи 164 КҶ Ҷумҳурии Тоҷикистон парвандаи ҷиноятӣ оғоз намуда, бо тасдиқи фикри айбдоркунӣ ба суди ноҳия фиристод. Ба Давлатова Г.М. бо ҳукми суд ҷазо дар намуди ҷарима ба андозаи 100 нишондиҳанда барои ҳисобҳо ба фоидаи давлат таъйин карда шуд.

Масъулияти падару модар ду ҷабҳа дорад. Аввало падару модар уҳдадории худро адо намуда, вазифаи хешро оид ба таълиму тарбияи фарзанд дар назди давлат ва ҷомеа иҷро менамоянд. Волидон барои ба таври зарурӣ ба иҷро расонидани уҳдадориҳои ба зиммадоштаашон бояд ҳамаҷониба кӯшиш ба харҷ диҳанд, то вазифаи падару модарӣ, ҳамчунин, инсонии худро ба анҷом расонанд. Ин масъулияте мебошад, ки азалан ба зиммаи ҳар як падару модар гузошта шудааст ва бояд онро ихтиёран ба иҷро расонанд. Вақте ки падару модарон аз иҷрои уҳдадориҳои худ дар боби таълиму тарбияи фарзандон саркашӣ менамоянд, ба он оварда мерасонад, ки рафтори фарзандони онҳо боиси вайрон кардани ҳуқуқи дигарон ва тартиботи ҷамъиятӣ мегардад. Дар ин сурат лозим меояд, чунин ашхос уҳдадории худро дар зери маҷбурияти давлатӣ амалӣ кардаву ба ҷавобгарӣ кашида шаванд.

Қонуни мазкур на фақат падару модар ва кормандони мактабу маориф, инчунин, ҳар як фарди ҷомеаро, новобаста аз мансабу вазифа, ҳизбият ва мансубияти динию мазҳабӣ вазифадор мекунад, ки нисбат ба таълиму тарбия масъул бошанд ва дар ин самт бетарафиро ихтиёр накунанд.  

 

Азиззода C.С,

прокурори ноҳия,

 мушовири адлияи дараҷаи 1.

«АПТЕК»-У «БАЛНИСА» НЕ, «НАЛОГ» ҲАМ НЕ, ДОРУХОНАВУ БЕМОРХОНА, НОЗИРОТИ АНДОЗ ВОЖАҲОИ ЗЕБОЯНД

Вақте ки мо ба забони давлатӣ-модарии хеш арҷ гузоштанӣ ҳастем, нахуст  бояд дар гуфтугузор, суҳбату вохурӣ, суханронии байни яку ду ё ом диққат диҳем. Дар хона бо аҳли оила низ нагузорем, ки фарзандони мо дар муошират аз каломи  ғайритоҷикӣ истифода кунанд. Манзур ин аст, ки мо ҳар соату ҳар дакиқа дар суҳбатҳои сарироҳӣ бо наздикони худ ин вожаҳои номақбулро шунида  нороҳат мешавем. Ҳатто аз нафарони масъул, идорашинҳо, иддае аз роҳбарон (маъзарат аз кулашон) зиёд мешунавем, ки «я балниса рафта биём» ё «аптек мерам, тез меём» ва боз «налог файрод кардиян, чӣ мегуфта бошан», гӯён ба ҳам муошират мекунанд. Албатта солиёни зиёд дар истилоҳоти насли калон ин вожаҳои маъмулии муошират буд, аммо аз қабул ва истифодаи ҳатмии забони тоҷикӣ, ҳамчун  забони давлатӣ  беш аз ду даҳсола сипарӣ мешавад. Наход, ки то имрӯз мо масъулият ҳис накунем, ки дар ин самт Қонуни  Ҷумҳурии Тоҷикистон ба тасвиб расидааст ва борҳо ба он таҷдиди назар низ шудааст.  Ҷавонони то сисолаи мо дар замоне ба камол расидаанд, ки забони муошират ва коргузории мо забони тоҷикӣ мебошад.  Забоне, ки ба он Ҳофизу Саъдию Бедил, Бозору Лоиқу Гулрухсор шеър гуфтаанд. Пас, мо вазифадорем, ки ин забонро чун дигар муқаддасоти миллии кишварамон ҳифз кунему ба он арҷ гузорем. Тавре болотар ишора шуд, агар мо тозагию нафосати забони тоҷикиро аз хона, аз оила оғоз накунем, он гаҳ  дар мактаб ё ҷои корамон ба душвориҳо рӯ ба рӯ меоем. Барои ин ҳамарӯза бо фарзандон бо лаҳни хубу шевои тоҷикӣ ҳарф гуфтан, вазифаи ҷонии ҳар як падару модар аст. Дигар ин ки, хуб мешуд аҳли зиё дар кӯчаву хиёбон ва ҷойҳои ҷамъиятӣ барои тозагию нафосати забони модарии мо бо мардум суҳбатҳои сарироҳӣ ва кӯтоҳе доир намуда, онҳоро аз истифодаи калимаю ибораҳои ғайр боздоранд.

Ҳар нафаре, ки ба забони модарии хеш-забони тоҷикӣ арҷ мегузораду ин забонро эҳтиром мекунад, бояд бе ягон тарсу изтироб ва ё дидилагӣ ҳамсуҳбати худро аз ғалат гуфтану ғалат ҳарф задан нигоҳ дорад. Дар ҳамин сурат мо забони тоҷикии худро тоза аз ҳама олудагиҳо нигоҳ дошта метавонем.

Мактаб ва корхона макони дувуми  омӯзиш ва пок нигаҳ доштани забони модарӣ мебошад. Аён аст, ки агар мо забони модарии хешро  дар сатҳи лозима надонем, омӯзишу донистани забони дигар низ барои мо душвориҳои грамматикиро пеш меорад.  Гуфтаи шоир ҳам ба ин маънӣ аст:

Ҳар кас ба забони худ сухандон гардад,

Донистани сад забон осон гардад. 

Дигар аз воситаҳое, ки моро ба қиматии забони модарӣ далолат мекунад, ин шиору овезаҳои идораву муассисаҳо ва роҳу кӯчаву хиёбонҳо аст. Дар ин овезаҳо мебояд панду андарзҳои дорои мазмуни баланд, ҳидояткунанда ба ахлоқи ҳамидаи инсонӣ, муҳаббат ба Ватан-Модар мисраҳои талқинкунанда ба фардои нек аз абёти классикони форсу  тоҷик ҷо гиранд. Ва ҳамаи ин навиштаҳо  зери назари  комиссияи махсуси назди мақомот, ки ба назорати риояи забони давлатӣ  сару кор дорад, анҷом бояд гирад.

Бо риояи ҳамаи ин талабот мо як рукни муқаддасоти миллии хеш – забони давлатӣ, тоҷикиамонро  ҳифз карда,  ҳамзамон яке аз вазифаҳои муҳими хештаншиносиро ба ҷо меорем ва ба ояндаҳои худ  аз ғановату бузургии ин забон бо сари баланд ҳарф зада, ифтихор ҳам карда метавонем.

ПАРЧАМ – РАМЗИ ДАВЛАТИ СОҲИБИСТИҚЛОЛ

 

Инак, соли нуҳум аст, ки дар саросари кишварамон Рӯзи Парчами давлатии Ҷумҳурии Тоҷикистон ҳамчун яке аз санаҳои барои давлату миллат бениҳоят арзишманд ботантана таҷлил мегардад. Моҳи ноябри соли 1992 дар Иҷлосияи таърихии 16-уми Шӯрои Олии Ҷумҳурии Тоҷикистон, ки дар он тақдири ояндаи давлати миллӣ тарҳрезӣ гардид, ба сӯи ҳадафҳои умумимиллӣ, сулҳу субот ва Ваҳдати миллӣ қадамҳои нахуст гузошта шуданд. Барои андешидани тадбирҳои зарурӣ доир ба таъмини сарҷамъии мардум ва ҳифзи тамомияти арзии кишвар, инчунин рамзҳои нахустини давлати соҳибистиқлоламон-Парчам ва дертар Нишон қабул карда шуданд.

Президенти мамлакат Эмомалӣ Раҳмон бо нишони эҳтирому садоқат ба Парчами миллиамон бо фармони худ аз 20-уми ноябри соли 2009 24 ноябрро  Рӯзи Парчами давлатии Ҷумҳурии Тоҷикистон эълон доштанд.

Ба хотири мақому манзалати Парчам дар рукни давлатдорӣ сарвари давлат пояи бунёди манораи бузурги парчамро пешниҳод намуданд, ки аз тарафи умум ҷонибдории комил ёфт. Дар дуюмин солгарди Рӯзи Парчами давлатии Ҷумҳурии Тоҷикистон маросими бунёди манораи бузурги парчам оғоз гардида, дар давоми як сол ба анҷом расид.

30 августи соли 2011 дар маркази шаҳри Душанбе Парчами давлатии Ҷумҳурии Тоҷикистон дар пояи 165 метр, ки баландтарин дар ҷаҳон аст, парафшон гардид. Баландии Парчам 30 метр ва паҳноии он 60 метр мебошад.

Парчам ҳанӯз аз замонҳои хеле қадим рамзи давлатдорӣ, шукӯҳу ифтихор ва нангу номус ба ҳисоб мерафт. Бозёфтҳои бостоншиносӣ, ҳафриёт, ки то ба имрӯз боқӣ мондааст, аз он гувоҳӣ медиҳанд.

Дар ҷаҳони муосир доштани Парчами миллӣ нишони истиқлолият, яке аз рамзҳои асосии давлатдорӣ ва ваҳдати миллӣ мебошад.

Парчами миллӣ ифодагари иқболу истиқлол, иттиҳоду сарҷамъӣ, нангу номус, ватандӯстиву ватанпарастӣ ва ҳуввияти миллии мардуми куҳанбунёду фарҳангии мо буда, волотарин мақсаду мароми тоҷиконро дар ҷилои рангҳои худ инъикос намудааст.

Парчами давлатии Ҷумҳурии Тоҷикистон ҳамқадами соҳибистиқлолии ватанамон буда баробари Конститутсия, Нишон, Суруди миллӣ ва асъори миллӣ аз ҷумлаи рамзҳо ва муқаддасоти давлатӣ маҳсуб мешавад, ки дар иҷлосияи 16-уми Шӯрои  олии Ҷумҳурии Тоҷикистон қабул гардида буд.

Аз он рӯзе, ки миллати соҳибмаърифатамон соҳиби Парчам гардид, дар ҳаёти мамлакату ҷомеаи кишвар бисёр дигаргуниҳои бунёдӣ ба амал омаданд ва барои пешрафти ҳамаи соҳаҳои иқтисодиёт, илму маориф ва маънавиёти мардум шароити мусоид фароҳам оварда шуд. Равобити дӯстиву ҳамкорӣ, аз ҷумлаи робитаҳои дипломатӣ ва иқтисодиву фарҳангӣ бо бисёр кишварҳои хориҷӣ густариш ёфтаанд, давлати мо узви комилҳуқуқи Созмони Миллали Муттаҳид ва дигар ташкилоту созмонҳои бонуфузи байналмилалӣ гардид. Имрӯз Парчами миллии мо дар қатори парчами дигар кишварҳо дар фарози созмонҳои баландпояи ҷаҳонӣ парафшон аст, ки мояи ифтихору рӯҳбаландӣ ва эҳтироми ҳамаи ҳамватанони азизи мо мебошад.

Моро мебояд, аз Парчами миллии худ ифтихори том дошта бошем, эҳтироми онро ҳамчун нишони давлатдории миллӣ, озодӣ ва иқтисодиёти ватан, чун сарвати гаронбаҳои умумимиллӣ баҷо орем, қадру манзалат ва нақшу эътибори онро ба фарзандони худ ва ҷавонону наврасон талқин намоем.

Бигузор парчами пурҷило ва нурафшони истиқлолият дар дилу дидаи ҳар як сокини диёрамон меҳри Ватанро афзунтар намояд ва асрҳои аср дар фазои озоди кишварамон парафшонӣ кунад. Парчами озодиву саодати давлати соҳибистиқлоли мо ҷовидону парафшон бод.                                                                                                                     

Мирзозода Ф. М.,

судяи суди ноҳия.

Подкатегории