ХАБАРҲО

НУҚТАҲОИ ОБИ НӮШОКӢ ДАР БОҒИМИРИЮ ХАМИСАВРА

Сокинони деҳаҳои Боғимирии ҷамоати деҳоти ба номи Дӯстмурод Алиев ва Хамисавраи ҷамоати деҳоти Ҷавонон солҳои тӯлонӣ аз нарасидани оби нӯшокӣ танқисӣ мекашиданд. Арафаи иди Истиқлолияти кишвар мушкилоти сокинони ин деҳаҳо ҳалли худро ёфт. Бо дастгирии бахши дар ноҳия фаъолиятдоштаи МСДСП хатҳои оби нӯшокӣ ба фаъолият шуруъ карданд. Сокинони деҳаҳои номбурда бо дарки баланд баҳри ободии деҳа, хурду бузург дар рафти сохтмони он бо дасту дили гарм кор карданд. Ин дилгармию садоқати онҳо ба кори анҷомдодаашон дар рӯзи ҷамъомадҳои тантанавӣ, ки 29 август доир гардид, ҳис шуд.

Раиси ҷамоати деҳоти Дӯстмурод Алиев Зайдулло Зубайдов ба ҷамъомади деҳаи Боғимирӣ ҳусни ифтитоҳ бахшида зикр намуд, ки сохтмони хатти оби нӯшокии деҳаи мазкур аз масофаи 7000 метр аз чашмаҳои мусаффои куҳӣ Сорхо кашида шуда, талаботи беш 150 хоҷагии деҳаро қонеъ менамояд. Боиси қайд аст, ки давоми 8 моҳи охир дар ин ҷамоат маротибаи сеюм аст, ки ҷиҳати анҷом додани барномаи хатти оби нӯшокӣ лентаи рамзӣ мекушоянд.
Сокинони деҳаи Хамисавраи ҷамоати деҳоти Ҷавонон ҳам чунин як тантанаи фаромӯшнашавандаро ба хотири мавриди истифода қарор додани хати оби нӯшокии деҳа оростанд.
Раиси ҷамоати деҳоти Ҷавонон Сафаралӣ Раҷабов зимни баромади худ иброз дошт, ки дар арафаи таҷлили иди барои ҳамаи мо азизу муқаддас - 23-умин солгарди Рӯзи Истиқлолияти кишвар дар ҳаёти сокинони деҳаи Хамисавра боз як воқеаи фаромӯшнопазиру хотирмон ба амал омада истодааст.
Воқеан ҳам тайи чанд соли охир бо кӯшиши сокинони деҳа ва дастгирии мақомоти иҷроияи ҳокимияти давлатии ноҳия ва ҷамоати деҳоти Ҷавонон баҳри ободии деҳа корҳои зиёди созандагӣ амалӣ шуда истодаанд. Бунёди мактаби наву замонавӣ, таъмиру тармими роҳҳои дохили деҳа, оғози бунёди бунгоҳи тиббӣ рӯйхати корҳои анҷомёфтаву идомадоштаи мардуми деҳа аст.
Мавриди истифода қарор гирифтани хати оби нӯшокӣ аз масофаи 7 километр, ки имкон медиҳад сокинони деҳаро тамоми фасли сол бо оби нӯшокӣ таъмин гардонад, гувоҳ аз якдигарфаҳмию мутаҳиддии сокинони деҳаи Хамисавра аст дар роҳи ободонии деҳаи худ.

«НФ».