ИҶТИМОЪ

РЕЗАСУХАН

Дар зиндагӣ сахӣ бошед, зеро дороии дунё на ба кас вафо кардаасту на бақо дорад.
                ***
Агар шумо фақр набинед, фахр намеёбед.
                ***
Таҷрибаи зиндагӣ китобест, ки ҳар рӯз варақгардон бояд кард.
                ***
Аз ходаи қоқ соя, аз каси ашқар инсоф маҷӯед.
                ***
Сухани зишт  дуди қаланфур аст, ки димоғро месӯзонад.
                ***
Аз ғизо сер шудан амри воқеист, аммо толибилми ҳақиқӣ аз хондан серӣ надорад.
                ***
Имрӯз аз гиребони кас доштӣ, фардо аз гиребони ту медоранд.
                ***
Ба касе туҳмат мабоф, то ба ту туҳмат назананд.
                ***
Роҳбандӣ макун, то роҳат баста нагардад.
                ***
Дар сухан ҳалиму нарм бош, то нарм сухан шунавӣ.
                ***
 «Худам шоҳу таъбам вазир»ғгуфта касро нимароҳ макунед, зеро худ дар нимароҳ мемонед.
                ***
Рафиқатонро ба кирдор озмоед, на ба гуфтор.
                ***
Сухане, ки ҳуҷҷат надорад, оқибаташ шармандагӣ аст.
                ***
Бо бадкорон  чунон рафтор кунед, ки надонанд, ки ту медонӣ.
                ***
Агар сухан гуфтанӣ бошӣ, на думбурида гӯю на думдароз.
                ***
Бо хирад мол ба даст овардан осон, вале мол хирад намезояд.
                ***
Баднафсӣ мисли аспи носараест, ки соҳибашро ба бало меандозад.
                ***
Дар зилати нокас зистан мурдан беҳтар аст.
                ***
Раҳнамои ҷомеаи печида аҳли эҷод аст.
                ***
Онҳое, ки дар саҳнаи зиндагӣ хешро ба ҳар шакл ҷилва медиҳанд, чоплусанд.
                ***
Ҳар кӣ атрофро бо чашми ақл мебинад,  пушаймон намешавад.

                Қ.ҶОМӢ, омӯзгор.