ИҶТИМОЪ

БО КОР ТАЪМИН ШУДАНД

Шуъбаи Агентии меҳнат ва шуғли аҳолӣ рӯзи 18 август дар бинои қасри фарҳанги ноҳия ярмаркаи ҷойҳои кори холӣ ва вазифаҳои озодро баргузор кард. Мо аз сардори шуъбаи Агентии меҳнат ва шуғли аҳолии ноҳия Р. Ҷалилов хоҳиш намудем, ки оиди натиҷаи баргузории ярмаркаи ҷойҳои кори холӣ ва вазифаҳои озод барои хонандагони рӯзнома иттило диҳад.
-Дар ярмарка 15 корхона, ташкилоту муассисаҳо 59,25 ҷойҳои кори холӣ ва вазифаҳои озодро пешниҳод намуданд.   Маркази таълимии калонсолон ва Литсеи касбии техникӣ барои қабули касбомӯзон зиёда аз 50 номгӯи касбу ҳунарҳои коргариро барои таълим ба курсҳои кӯтоҳмуддат даъват намуда, машварат гузарониданд.
Дар ярмарка 86 нафар корҷӯён ва касбомӯзон аз ҳудуди ноҳия иштирок намуданд. Бо тавсияномаи шуъбаи Агентии меҳнат ва шуғли аҳолии ноҳия 5 нафар корҷӯён ба ҷойҳои кори холӣ дар ҷамоати деҳоти Бӯстон, муассисаҳои таълимии ноҳия ва мактаби варзишӣ роҳхат гирифта соҳиби кор гаштанд. Ба 15 нафар ҷавонони корҷӯй роҳхат ба касбомӯзӣ дода шуда ба 20 нафар иштирокчиён оид ба дуруст интихоб намудани касб дастурҳо дода шуданд.
Дар ярмаркаи мазкур   ширкати фаъоли намояндагони шуъбаи маориф, бахши фарҳанг, литсеи касбии техникӣ, КВД хоҷагии манзили коммуналӣ, хоҷагии ҷангал, ҷамоати шаҳраки Файзобод, раёсати кишоварзии ноҳияро метавон қайд кард.  
Бояд гуфт, ки дар корхонаю муассисаҳои ноҳия ҷойҳои кори холӣ ва вазифаҳои озод бисёр мушоҳида мешаванд. Роҳбарони корхонаҳо сари вақт ба шуъбаи Агентии меҳнат ва шуғли аҳолӣ ҷойҳои кори холӣ ва вазифаҳои озодро маълум накарда, корҷӯён аз он бехабар мемонанд. Дар рӯзи баргузории ярмарка намояндагони корхонаҳои ҶДММ "Мурғи ҳилол", хоҷагии об, идораҳои сохтмонӣ, кумитаи замин, беморхонаи марказӣ, ҷамоатҳои деҳот, идораи барқтаъминкунӣ, ҷамъияти матлубот иштирок накарданд.
Шуъбаи Агентии меҳнат ва шуғли аҳолӣ дар ноҳия бори дигар роҳбарони ташкилот муассиса ва корхонаҳоро даъват менамояд, ки дар ҳамкории доимӣ ба фаъолияти меҳнатӣ ҷалб намудани корҷӯён, ки дар ноҳия онҳо хело зиёданд, саҳмгузор бошанд.                                            

М. ТАҒОЕВА,
мухбири худамон.