ИФТИХОР

АБДУРАҲМОН АҲМАДОВ ДОНИШМАНДИ СОХТМОНУ МЕЪМОРӢ

Сарредаксияи илмии «Энсиклопедияи миллии тоҷик» дар пайи муаррифӣ намудани донишмандони Тоҷикистон, ки тасмими хеле оқилона ва андешамандона мебошад, унвонии ҷилди аввали «Донишномаи донишмандони Тоҷикистон дар ибтидои қарни XXI»-ро пас аз даҳ соли ҷамъоварии матолиб манзури чоп кард. Дар ин китоби калонҳаҷм номварони илми муосири кишвар ҷой гирифтаанд. Мавриди аҳсант аст, ки «Донишнома…» сурати Абдураҳмон Аҳмадов, собиқ сармеъмори ноҳия (1978-1982), сардори Раёсати сохтмонӣ ва таъмири биноҳои ноҳия (1982-1985), сардори корхонаи комбинати манзилии муассисаҳои коммунали ноҳия (1985-1992)-ро бо шарҳи ҳол ва номгӯи асарҳои офаридааш ҷой додааст. Абдураҳмон Аҳмадов чанд соли то нафақа баромадан дар Хадамоти назорати давлатии меъморӣ ва сохтмони Кумитаи меъморӣ ва сохтмонии назди Ҳукумати Ҷумҳурии Тоҷикистон фаъолият доштанаш (2005-2014) се китоб: «Сохтмончиёни Тоҷикистон», «Бунёдкориҳои меъморон ва сохтмончиёни Тоҷикистон» ва «Иншооти даврони истиқлол» таълиф кард. Асарҳои А.Аҳмадов аҳамияти соҳавӣ дошта, дар ояндаи наздику дур ба онҳое, ки ба соҳаи сохтмону меъмории Ҷумҳурии Тоҷикистон мароқ зоҳир менамоянд, маълумоти пурарзиш дода метавонанд.